पर्ख ! सँगै हाँसौंला

तिमी धेरै हाँसेको देख्दा

हाँस्न  बिर्सेका ओठहरू पनि

तिम्रो ओठसँगै हाँस्न खोज्छन्

तर, बाटो बिराएको यात्री झैं

हाँसो बीचमै अल्मलिन्छ

हाँसोको विनिमय हुने भए

हाँसो किनेर तिमी झैं हाँस्ने थिएँ

मनलाई पखेटा राखेर आकाशमा उडाउने थिएँ

 

खै, के के गर्थें, के ।

सापटी लिन मिल्ने भए,

एक टुक्रा हाँसो मलाई पनि सापटी देऊ

तिमी सँगसँगै हाँसेको देख्न चाहन्छौ भने

अलिकति हाँसो सुटुक्क देऊ

तर, थाहा छ मलाई

हाँसो दिने भन्दा हाँसो खोस्नेहरू

लाम लागेर यता तिर पर्खि रहेछन्

अरु हाँसेको हेर्न नचाहनेहरू

यतातिर छ्यापछ्याप्ती भेटिन्छन्

तिमीप्रति चाहिँ अलिकति आशावादी छु

साँच्चै ! तिम्रो हाँसो लिउँ लिउँ लाग्छ

अझ सके त चोरूँ चोरूँ लाग्छ

 

तर, गिजा देखाएर

हृदय खोलेर हाँस्ने दिनहरू पनि

सकिएछन् कि कसो ?

नत्र तिमी सँग सँगै म किन

हृदय खोलेर हाँस्न सक्दिन थिएँ र ?

हाँसोको दौडमा म किन सदा

पछाडी पछाडी मात्र आफूलाई पाउँथे र ?

 

अब तिमी पनि धेरै हाँस्ने नगर

कमसेकम मेरा लागि।

अचेल मलाई हाँस्नेहरूसँग

कता कता ईर्ष्या लाग्छ

मेरो हाँसो कता उड्यो कता

हराएको हाँसो भेट्टाएपछि प्रतिस्पर्धा गरौंला

हाँसो खोज्दैछु

पर्ख ! हामी सँगै हाँसौंला ।