मेरो मालिकले शाेरुमबाट निकाल्दा
अस्तित्व सहितकाे स्वतन्त्रता
महशुस भएकाे हाे पहिलाेपटक ।
गुँडबाट भर्खरै उडान भरेकाे
पन्छी झैं उन्मादी र चन्चलतापुर्ण;
एक निर्जीव तर पेट्राेलयुक्त प्राणीको
राेमान्चक यात्राको सुरुवात,
म बन्धनमा थिएँ तर म गुड्दै थिएँ;
म कसैकाे अधिनमा थिएँ, तर उसैकाे आँगनमा थिएँ ।
मान्छेले आफ्नाे कल्पनालाई
कैयौंपटक मेसिनमा पेलेपछि
निश्चित गरिएकाे हो मेराे आकार;
तिमिले पुर्यायौ प्रतिस्पर्धाकाे बजारमा
र सामेल गरायौ मानव व्यवहारमा ।
याे यात्रामा व्यवहार पढ्दै जादाँ,
देखियो धनी मान्छे, बडेमान घरका गेटहरू,
अनि छाला उध्रेका गरिबहरू – छाप्राे उध्रेका घरधुरी ।
घुम्दै जाँदा, गुड्दै जाँदा
पढियाे महंगी बजारकाे मेनुकार्ड,
छाेराछाेरीकाे नयाँ लुगाको रहर ।
देखियाे कसैकाे हराभरा बारी त
कसैकाे बलाैटे बगर ।
स्कुल शुल्कको चापदेखि सरकारी कर
र सदैव आजित मेराे मालिककाे मुहार,
तर पनि जिन्दगी बेहतरिन थियाे
कमसेकम यात्रा जाे चलिरहेकाे थियाे ।
तर याे यात्रा बिचमै राेकियाे
आजै तिमि आयौ, खन्यायौ मट्टीतेल
आगाे लगाएर मलाई गर्यौ जुलुस –
महान क्रान्ति – जिन्दावाद !
के यत्ति नै हाे तिम्रो भाषाकाे बिद्रोह
गरिबकै सम्पत्ति जलाउनु पर्ने बिद्रोह ?
तिमिले जलायाै निर्जीव बस्तु ?
हैन तिमिले जलायाै आफ्नै सपना,
आफ्नै सृजना, आफ्नै एक सन्तान ।
गाँसकाे सम्भावना,
बास बस्ने ठेगान,
स्कुल शुल्ककाे भरोसा,
सारी चाेलीकाे आश,
जीवनयापनकाे आधार
तिमिले बालेकाे बिद्रोहकाे आगोमा
हरेक पटक जलायाै गरिबकाे मन
तपाईंलाई यो पनि मन पर्न सक्छ
ए, बिद्रोही मान्छे! कहिल्यै साेचेका छाै ?
याे जलिरहेकाे मनले
कुनै दिन मट्टीतेल भेटायाे भने !!!
निभ्ने छैन बदलाकाे डढेलाे
संसार जलेर खरानी नहुन्जेलसम्म
त्यसैले;
तिमि हिँडेकाे बाटाे प्रतिगमन देख्छु म त ।
लेखक परिचय
अङ्ग्रेजी साहित्यमा स्नातकोत्तर गरेका खड्का गजल र कविता लेखनमा नवीन प्रतिभा भएर उदाएका छन्।
