बैरागी काईंला – औंलाहरू चुमेर
औंलाहरू चुमेर औँलाभरि सलाम
मेरो हजुरलाई आँखाभरि सलाम,
के बिराएँ ? नजरले चुमेँ
ती फूल जो ओठमा फुले
के बिराएँ ? हत्केलामा थापेँ
ती केश जो लाजमा झुके
मानेँ, कि मेरो हजुरलाई
बाटोभरि साह्रै गरी लाज लाग्यो रे,
औँलाहरू चुमेर औँलाभरि सलाम
मेरो हजुरलाई आँखाभरि सलाम,
के बिराएँ ? सपनामा आएँ
सपना र विपना पगालेँ
के बिराएँ ? फूलमा गालेँ
सीमाना र साँध नै पगालेँ
मानेँ कि मेरो हजुरलाई सपनामा
रातभरि नीद लागेन रे ।
बैरागी काईंला – औंलाहरू चुमेर
तपाईंलाई यो पनि मन पर्न सक्छ
लेखक परिचय
बि. सं. २०६६ देखि बि. सं.२०७० सम्म नेपाल प्रज्ञा प्रतिष्ठानको कूलपति रहेका वैरागी काइँला (तिलबिक्रम नेम्बाङ) नेपाली साहित्यका मूर्धन्य साहित्यकार हुन् । उनी आयामेली आन्दोलनका प्रवर्तक समेत हुन् ।
