सीवाँलीको झ्याङबाट लुक्दै–लुक्दै
हेरिरहेको छु म–
बर्षौँदेखि कसैलाई पर्खिरहेको एक्लो मानिस
बार्दलीमा बसेर टोलाइरहेको छैन आज
उक्लिरहेको छु म पनि एक्लै उकालोमा
र हेरिरहेको छु टाढा–टाढा
कुनै युद्धपछिको मैदानजस्तो सुनसान छ चारैतिर
हेरिरहेको छु– मेरै उज्यालोमा हिँड्ने ढाक्रेहरू हिँडिरहेका छैनन् आज
हेरिरहेको छु– हाट भरेर फर्किरहेका छैनन् कोही
हेरिरहेको छु– मलामी गएर फर्किसकेको रित्तो बाटोजस्तो छ मूलबाटो
सधैँ जुनेलोको बोटमा आएर खेल्ने हावा गायब छ आज
निकुवाको सुकेको ठुटोमा अबेरसम्म नाचिबस्ने ठुटेचरो देखिन्न आज
साँझको पहिलो प्रहरमै एकनाशले रुने झ्याउँकिरी समेत चुपचाप छ आज
सधैँ एकसुरले गुनगुनाइरहने सुन्तले खोला समेत मौन छ आज
तपाईंलाई यो पनि मन पर्न सक्छ
थरथर–थरथर काँपिरहेका छैनन् झाँक्री स्याउलाका पातहरू
एक रुखदेखि अर्को रुख गर्दै उडिरहेको छैन लाटोकोसेरो
कतै सुनिएको छैन जङ्गली भुस्याहाका कर्कश आवाज
यति चर्को शासन गर्न थालेछ शून्यताले
कि म आफैँ पनि शून्य–शून्य भएको छु यसबेला
शून्य….. शून्य उक्लेर
अहिले त्यही सुनसान घरको शीरमाथि छु म
र हेरिरहेको छु
बर्खाभरि झरीले कुटेर छेँडिएको
क्लान्त र उदास धुरीबाट भित्र–
बर्षौँदेखि बार्दलीमा बसेर कसैलाई पर्खिरहेको एक्लो मानिस
कोही आउने पर्खाइमा
झाँक्री स्याउलाको पातजस्तो थरथर काँपिरहेको शरीर
र सुन्तले खोलाजस्तो सुसाइरहेको आँखा बिछ्याइरहेछ
सुनसान कोठाको अन्धकारमा
उता अघिजस्तै बाहिर प्रार्थना गरिरहेको छ सुनसान मूलबाटो
अघिजस्तै प्रार्थना गरिरहेको छ झ्याउँकिरी, ठुटेचरा र बतास
अघिजस्तै प्रार्थना गरिरहेको छ सुन्तले खोला, अम्लिसो र झाँक्री स्याउलाका पातहरू
तितेपाती, तुलसीको बोट
र एक्लो मानिसले रोपेको केराका पातहरू सब–सब प्रार्थनामा छन् अघिजस्तै
एक्लो मानिसका लागि
म पनि त प्रार्थनामा छु अहिले
बरु म आफैँ निभेर
मेरो जम्मै उज्यालो
एक्लो मानिसलाई मिलोस्
र त्यही उज्यालोमा भेटियोस्
बर्षौँदेखि बार्दलीमा बसेर पर्खिरहेको कोही मानिस ।
लेखक परिचय
विगत दुई दशकदेखि कविता र अखबारी लेखनमा सक्रिय हेमन यात्री मोरङमा जन्मिएका हुन् । हाल ईटहरीमा बसोबास गर्दै उनी साहित्य र अखबारी लेखनमा निरन्तर लागिरहेका छन् । गीत/गजल सङ्ग्रह "आँसुको मूल्य", २०६० र रत्न पुस्तक भण्डार काठमाडौँबाट प्रकाशित कविता कृति "पहाड मसितै यात्रा गर्छ", २०६९ उनका प्रकाशित कृति हुन् । फिनिक्स बुक्स काठमाडौँबाट उक्त कृतिको चौँथो संस्करण समेत प्रकाशित भइसकेको छ । कवि यात्री देशविदेशबाट करिब डेढ दर्जन सम्मान र पुरस्कारबाट विभूषित भइसकेका छन् ।
