१.
पुरानो लालबजार
कहाँ खोजूँ
मेरी आमालाई ।
तपाईंलाई यो पनि मन पर्न सक्छ
२.
नफल्ने
बनतरुल
गोर्खाल्यान्ड ।
३.
( यथार्थतता )
अब त तिम्रो झूटो
आश्वासनको क्रान्ति
बेकाम छ ।
४.
अहम
अर्कालाई मारेर
आफू महान बन्ने ।
५.
बैँस
जूनको मुस्कानमा
गुराँसको रंग ।
६.
( सपना र विपना )
सपनाको एउटा माला
विपनाको थुङ्गाहरू
भएर चुडिँयो ।
७.
बाँचेको देश
देशदेखि प्रदेशको कथा
रित्तो सपना ।
८.
आगोका फूल
मनका माझबाट
विद्रोह बोल्छन् ।
९.
भेंडाको हुल
महलमा सुस्ताउँछन्
पुल्ठो खोजौं न ?
१०.
नेताको थुप्रो
काम गर्नु छैन
भयो बेकार ।
११.
ठूलो समुन्द्र
नुनै नुनको पानी
भो क्रान्तिको परिवर्तन ।
१२.
परिवर्तन
निरङ्कुश शासन
पल्टा खान्छ अवश्य ।
१३.
मान्छेको बोली
आफैंलाई ढाँट्छ
भरोसा कति ?
१४.
बेघर मान्छे
घरको सपना
घाट पुग्छन् ।
१५.
गरिबी बोली
एक गाँस र बास
पेटै कोपरयो ।
१६.
यो गान्तोक शहर
भ्रष्टाचारमा मान्छेत्व
भोग लिने गर्छन् ।
१७.
निक्कै नै चर्को
रित्ता परेलीभित्र
भोकको गीत ।
१८.
भावना ओडदै
भोकसँग बाँचेको
मेरो नम्रता ।
१९.
परिवर्तन
उपाख्यान श्रृङ्खला
हास्यव्यङ्ग्य ।
२०.
सप्रसङ्ग व्याख्या गर
क्रान्ति, परिवर्तन, व्यवस्था
बेरोजगारी, मोर्चा, मर्चा ।
लेखक परिचय
साहित्यमा एम.ए गरेका सिक्किमका कवि युवराज घलेभाइ नब्बेको दशकदेखि साहित्य र पत्रकारितासँग संलग्न छन् । उनका कविता प्रकृति, जीवन, जगत् र अस्तित्वका विषयमा बढी लेखिन्छन् । आह्वान एउटा क्रान्तिको र क्रान्तिका समवेत स्वरहरू उनका प्रकाशित कृतिहरू हुन् भने फुटकर रूपमा उनका रचनाहरू विभिन्न पत्रपत्रिकाहरूमा प्रकाशित भएका छन् ।
