दुई लघुकथा – आलोक कुमार सातपुते
दरभाउ (रेट)
उस्तादः जमूरा।
जमूराः हजुर उस्ताद।
उस्तादः तँ अखबार पढ्छस् कि पढ्दैनस?
जमूराः पढ्छु उस्ताद।
उस्तादः त्यसो भए लौ भन् त आज के पढिस्?
जमूराः उस्ताद आज मैले एक नेताको बयान पढेँ कि उसलाई अर्कै पार्टीमा जानको लागि दुई करोड रूपैयाँको लोभ दखाइयो, तर आफ्नो पार्टीप्रति आस्था भएको कारण उसले पार्टी छोडेन।
उस्तादः यसको मतलब तँलाई थाहा छ?
जमूराः छैन उस्ताद।
उस्तादः अरे त्यो छट्टु नेताले आफ्नो दरभाउ कायम गरेको हो ताकि यदि किनबेचको प्रोग्राम बन्यो भने कम-से-कम उसले यो दरभाउ त पाइहालोस् । अब त्यो आस्थाको कुरा त बाबु राजनीतिमा आास्था त कपडा फेरेसरह फेरिइरहन्छ ।
जमूराः उस्ताद हजुर त राजनीतिमा हुनु पर्ने।
उस्तादः अरे म राजनीतिबाटै त निकालिएको हुँ।
व्यापारीकरण १
त्यो शहरको मुख्य बजारमा जडिबूटीको एक प्रचलित दोकान थियो। नाम थियो अग्रवालजीको दोकान। केही वर्षपछि त्यही दोकानको आस-पास, जडिबूटीका चार-पाँच दोकानहरू अरू खुले। सबैको बोर्डमा लेखियो अग्रवालजीको दोकान। स्थापित दोकानदारले आफ्नो बोर्डमा लेखायो सक्कली अग्रवालजीको दोकान, अनि अरू दोकानदारहरूले पनि लेखाए – सक्कली अग्रवालजीको दोकान । यो सबैकुरासँग दिक्क लागेर उसले बोर्डमा लेखायो – रघुनन्दनलाल अग्रवालजीको दोकान, अनि बाँकि दोकानदारहरूले एक कदम अगाडि बढेर लेखाए – सक्कली रघुनन्दनलाल अग्रवालजीको दोकान।
दुई लघुकथा – आलोक कुमार सातपुते
लेखक परिचय
भारतीय कथाकार आलोक कुमार सातपुतेले हिन्दी, उर्दु र मराठी भाषामा थुप्रै लघु कथा लेखेका छन् । उनका हिन्दीमा ५, उर्दुमा १ र मराठीमा १ गरी सात पुस्तक प्रकाशित भएका छन् । भारत र पाकिस्तानका विभिन्न प्रगतिशील पत्रिका र म्यागजिनमा आलोकका लघु कथा प्रकाशित भएका छन् । भारतका प्रतिष्ठित प्रगतिशील साहित्य पत्रिका हंस, कथादेश, नयाँ ज्ञानोदय, वर्तमान साहित्य तथा पाकिस्तानको डन–उर्दु, लालटेन, मुकाल्मा, हमसब, संगतलगायत पत्रिकामा आलोकका कथा प्रकाशित भएका छन् । त्यस्तै, आलोकका कथा नेपाली र बंगालीमा पनि अनुवाद भएका छन् ।
