लेज्ली पिंक्नी हिल – एउटा टाढाको देश (अनुवाद कविता)

लेज्ली पिंक्नी हिल
यी शहरहरूभन्दा धेरै पर, मैले देखेको छु
रुखोपन यो सुख्खा, यो जटिलताभन्दा पर
छ, त्यहाँ एउटा फराकिलो र सुन्दर बस्ती
जहाँ म कहिल्यै पुगेको छैन

यो लोभको दुर्गन्ध मरुभूमिभन्दा टाढा
यो घमण्डको शिखरभन्दा माथि
यी मरणशिल आवश्यकताको समुन्द्रपारि
जुन संरक्षित छ यसैका वासिन्दाबाट

यहाँबाट हेर्दा, थाहा त छ मलाई
त्यो गन्तव्य पार गर्ने यात्रा कति कठिन छ
तर मेरा पैताला निकै आतुर छन्
जहाँ पुग्नका लागि

त्यो परको नगरमा एउटै स्कुल छ
हर वासिन्दा उपस्थित हुन्छन्
छ एउटै नियममा खडा
जहाँ मानिस र मानिस साथी रहन्छन्

न त युद्ध छ त्यहाँ, न युद्धका क्षतिहरू
छ त केवल विश्वास र बढ्दो माया
यो त एउटा सुगन्धित नगर हो
जसका हर गल्लीहरू शान्त छन्                                                                                                              अमेरिकी कवि लेज्ली पिंक्नी हिलद्वारा रचित कविता ‘A Far Country’ को भावानुवाद 
लेज्ली पिंक्नी हिल